Semólínu-sítrónukaka
Lenka Mátéová og Peter Máté eru fædd í Tékklandi, en hafa starfað á Íslandi síðan 1990 og auðgað íslenskt tónlistarlíf svo um munar, Lenka sem kórstjóri og organisti, en Peter sem konsertpíanisti og nú prófessor við Listaháskólann. Þau heiðurshjón hafa dvalist mikið á Ítalíu, eru raunar nýkomin heim, heilluð af ítölskum mat og Miðjarðarhafsmataræði. Þau buðu í kaffi í vikunni með sítrónuköku, sem bragðaðist einstaklega vel og ekki síður með vanilluís. Fær maður einhvern tíma nóg af sítrónukökum?
Kakan sækir innblástur sinn til Sikileyjar þar sem sítrusávextir, möndlur og ólífuolía eru meðal helstu einkenna matargerðarinnar. Hér kemur semólína í stað „venjulegs” hveitis, möndlur gefa kökunni ríkulegt bragð og ólífuolían gefur henni mjúka áferð.
— Sítrónukökur – Sikiley – Miðjarðarhafsmataræði – Ítalía – Peter Máté og Lenka Mátéová – Tékkland –
.
Semólínu-sítrónukaka
Rifinn börkur af 1 sítrónu
Safi úr 1 sítrónu
Rifinn börkur af 1 appelsínu
Safi úr 1 appelsínu
185 ml extra virgin ólífuolía
215 g sykur
¼ tsk salt
3 egg
200 g fínt semólína hveiti (eða Durum hveiti)
115 g malaðar möndlur
1 tsk lyftiduft
1 tsk möndludropar (almond essence)
1 tsk appelsínublómavatn
4 msk Cointreau eða Grand Marnier
Form: 23 cm smelluform, smurt og botninn klæddur bökunarpappír.
Takið frá smávegis af rifnum sítrónu- og appelsínuberki til skrauts. Setjið afganginn í skál ásamt ólífuolíu, sykri, salti, sítrónusafa, appelsínusafa og eggjum. Þeytið með rafmagnsþeytara þar til blandan er ljós og slétt.
Blandið saman semólínu og lyftidufti í annarri skál og bætið möluðum möndlum saman við.
Hrærið möndludropum og appelsínublómavatni saman við eggjablönduna.
Hellið eggjablöndunni út í þurrefnin í einu lagi og blandið varlega saman þar til deigið er rétt samlagað. Forðist að hræra of mikið.
Setjið deigið í undirbúið form og sléttið yfirborðið.
Bakið í 160°C heitum ofni í 40–45 mínútur, eða þar til kakan er fallega gullin við brúnirnar og prjónn sem stungið er í miðjuna kemur hreinn út.
Látið kökuna standa í forminu í um 10 mínútur eftir að hún kemur úr ofninum. Dreypið síðan líkjörnum jafnt yfir kökuna.
Losið kökuna úr forminu og látið hana kólna á grind í um 10 mínútur til viðbótar. Fjarlægið botninn og bökunarpappírinn.
Berið fram heita eða við stofuhita, en ekki beint úr kæli. Stráið flórsykri yfir kökuna og berið fram með rjóma eða ís, ef vill.
Kakan geymist í loftþéttum umbúðum í allt að fjóra daga.
Fleira spennandi:
— Ísafjörður — Steikt andalæri — Vöffluuppskrifin besta — Hjónabandssælan — Múffur með eplum og haframjöli — Veislukaffi á Akureyri — Borðsiðanámskeið — Fyrsta íslenska matreiðslubókin –